الأنباط -
بقلم نضال انور المجالي
لما يكون الحكي عن الوطن وخطوطه الحمراء، ما فيها مجاملة ولا لف ودوران. جلالة الملك عبدالله الثاني ما بيستنى حدا يوصله الصورة ناقصة؛ عينه على كل شاردة وواردة، ووقوفه الشخصي بوجه الفساد هو الرسالة الأقوى لكل واحد فكر حاله أكبر من القانون أو ظن إنه يقدر يوكل حقوق الناس وهو متطمن.
تسليم التقرير السنوي لهيئة النزاهة ومكافحة الفساد لعام 2025 من قِبل رئيس الهيئة حازم باشا المجالي لجلالة الملك مش مجرد إجراء روتيني ولا احتفال بروتوكولي، هاي صفعة لكل فاسد ولعب تحت الطاولة. الملك كان واضح وصريح: ثقة المواطن بالمؤسسات مش مساحة للتلاعب، وما فيها تراجع. لما يكون رأس الدولة بنفسه هو الضمانة الأولى لمحاسبة كل متجاوز، هون بتعرف إن هالدولة ما بتساوم على مصلحة شعبها ولا بتساوم على هيبة مؤسساتها.
وجود قيادة عسكرية وقضائية صلبة على رأس الهيئة مثل حازم باشا المجالي بيأكد إن الحزم والعين الحمرا هي العنوان في هذه المرحلة. الفاسدين اللي مفكرين اللعبة خلصت، والجهات اللي بتسعى تضعف الثقة بين المواطن والدولة، اجاهم الرد الحاسم. مكافحة الفساد مش منّة من حدا، هي معركة وجود لكل أردني شريف بينتمي لهالتراب وللقيادة الهاشمية اللي ما عمرها خانت الأمانة.
الجدّ بدأ، وكل ملف بيتفتح وكل تقرير بينرفع بيعني إن المحاسبة واقعة لا محالة، وما في حدا فوق راسه ريشة، كائناً من كان. الأردن، بتاريخه وعزيمة رجاله وبقيادة ملك صلب ما بيعرف الهوادة، راح يضل أقوى من كل العابثين. يد الملك ساهرة على مصلحة هالناس، والمسيرة ماشية نحو الإصلاح الحقيقي بدون تردد. وكل خائن أو متطاول على المال العام نهايته معروفة قدام عدالة القانون والدولة.
حفظ الله الاردن والهاشمين
4 وجبات خفيفة تدعم صحة القلب وتساعد على ضبط ضغط الدم
