الجواز الأجنبي لا يصنع زلمة... اعرف حجمك أمام الأردني

الجواز الأجنبي لا يصنع زلمة... اعرف حجمك أمام الأردني

بقلم نضال انور المجالي

خاص الانباط....

شو هالمنطق العوج والانسلاخ اللي بصير بلمحة عين؟ أول ما يتناول أحدهم ورقة ملونة اسمها جواز أجنبي، نزع المبدأ والكرامة على باب المطار وبصير يفكر حاله مسك السماء بإيده! نسوا الأيام اللي كانوا يدوخوا فيها بالشواريـع ومن مكتب لمكتب بس عشان يحصلوا "رقم وطني" يلمهم ويصير عندهم إثبات وجود بالبلد! يوم كنت بالأردن لا كان يهمك البلد ولا من فيها ولا أخذت موقف، واليوم بعد ما بلعت الجواز الأجنبي صرت نازل فينا نقد وتفلسف وعامل حالك ناقد مثقف؟ استحي على نفسك! تفكر حالك بطل قومي يا رجل؟ أنت لا تمون على زوجتك في بيتك وجاي تتفلسف علينا!

​بمجرد ما يحط ذاك الجواز بجيبه، بتبلش عقد النقص تطلع. بصير يتخيل حاله مدير مخابرات على غفلة، ويحشر خشمه بكل شاردة وواردة! بلحقوا حتى مساعدات الجيش وقضايا البلد السيادية، وبصيروا يحللوا وكأنه الوطن كان ناقصهم أو جايين يعلمونا الوطنية من جديد.

​اعرف حجمك ولا تقف قدام أردني! إحنا شعب بنعرف مصلحتنا تمام، ومصلحتنا الثابتة هي الولاء المطلق للهاشميين وللوطن. إحنا شعب قائدنا عسكري وشعبنا عسكري، زلم ما بنحكى معها بهذه الفوقية ولا بينحشر الخشم بشؤونها. الكرتونة الأجنبية ما بتعمل منك زلمة ولا بتعطيك قيمة، وقيمة البني آدم بأصله وثباته مش بانسلاخه عن أهله. الوطنية مش بلوزة بتغيرها بكرسي الطيارة، والورقة اللي عطاك ياها الغريب ما بتعطيك الحق تتطاول على بلد حماك يوم كنت ميت عشان مجرد رقم!

حفظ الله الاردن والهاشمين