بقلم د. فاضل الزعبي

صحي ابو العبد .. صلى الفجر و راح عالدكانة ..

فتح الدكانة .. غلى القهوة و مج سيجارة هيشي لف ..

رش مية قدام الدكان ... وهو بيعيد و بيزيد ... يا فتاح يا عليم ... يا رزاق يا كريم ..

ابن ام فهمي اجى يشتري كبيريته .. رجعلّه ابو العبد قرشين من الشلن ..

عمي ابو العبد انت غلطان .. لازم ترجعلي ثلاث قروش .. امبارح اخذتها بقرشين..

ابو العبد قله رفعتها قرش اليوم ..

عمنا ابو العبد بعد ما يصلي العشا ..

بيقعد وكاسة الشاي جنبه على الطبلية ..

بفتح دفتر حسابات الدكانة (وبفخر بسميها الموازنــة العامــة)..

بشوف انو زودها بالمصاريف (اشترى كندرة جديدة وبوت وحطة وعكال) ....

الحل جاهز عند ابو العبد .. رفع سعر الكبريت او السكر او التايد او غيره..

لما بتسكر معاه بيسأل الخبير أبو يوسف ...

اللي بيجاوبه .... سهلة يا ابو العبد .. ارفع سعر الصلش ..

ولا اقولك : خليه نفس السعر بس جيب كاسات صغيرة..

ومرة اخرى نصيحته بتكون ..

لازم يدفعوا حق الكهرباء (الطــاقــة) ...

زيد سعر البيبسي البارد قرش واللبن واللبنة من الثلاجة قرشين ..

وهيك بترد خسارتك (رفــع الدعــم)..

بعدين يا ابو العبد البندورة ما لازم تنباع بنفس السعر طول اليوم ..

الصبح عليها طلب .. ميشان ساندوشات الفلافل .. زيدها قرش ..

الظهر بيزيد الطلب ميشان القلاية ..زيدها قرشين...

المساء بتنهبل الناس عليها .. برضه ميشان القلاية .. زيدها ثلاث قروش ..

و باقي النهار خليها بسعرها ....

وهيك بتكون عومــت الاسعـــار..

بعدين ارفع ايجار البسكليتات .. بدل ما اللفه بقرش سويها حسب وزن الراكب .. اللي وزنه فوق الالفين دوبلها عليه .. و اللي فوق الاربع الاف خلي الطاق ثلاثه .. اللي ما عنده ما بيلزمه و عمره ما ركب أو يخفف وزنه و السي سي تبعه .....

يعني يا ابو العبد ولا ابو لطفي اللي بيوضي و ما بيطفي ....

ميشان تعدل موازنتك .. مش لاقي غير جيبتي تاخذ منها؟

يا سيدي، مرحبابك .. بس ما ظل فيها اشي .. صارت مخزوقة وفاضية حتى من التعريفة..

ابو العبد دفترك مش موازنــة عامــة

والخبز الساخن مش رفــع دعـــم

وقلاية البندورة مش تعويــم اسعار

والصلش مش اقتصــاد مفتــوح

ولحم البقر و الله زيــادة فقــر و طفـــر

وانكسرت الحصالة و كثرت البطالــة

و صحن الفول ما بسد الجــوع و القــول